fotografia Le DL/Floriane Lionnet, publicada sus lo site dau Dauphiné libéré. Drechs reservats.
Se lei presas de paraula ambe una dimension sociala ò politica per d’arqueològs son una cauva relativament frequenta, es ben mai rar de n’acampar un cinquantenau, tot vièstits d’arange, a protestar sus la plaça d’una vila de talha mejana, ben luench de París.
Davant la catedrala de Valença, an manifestat aqueu dimars 4 de novembre de 2025 a l’iniciativa d’un agropament de sindicats per exigir de cavaments de sauvament avant lo demarratge dei trabalhs d’amainatjament de la plaça.
Ambiciós, lo projècte municipau compòrta la construccion d’un escalier doble monumentau ambe de jardins penjats, per religar lo centre pietonier a la vila bassa. L’ensems cubririá una superficia de 2 000 m2. L’escalier es anonciat per febrier de 2026. Pasmens, segon Pascal Congard Rethore, arqueològ despuei 40 ans, lei vestigis en dessota son excepcionaus. Un baptistèri paleocrestian dau sègle V seriá present tot bèu juste sota lo chantier.
La lèi dau 17 de janvier de 2001 relativa a l’arqueologia preventiva precisa que:
Un acòrd entre la persona que prevetz de realizar de trabalhs e l’institucion publica [l’INRAP] definís lo relambi per lo diagnostic e la realizacion dei cavaments, lei condicions d’accès au terren e lei condicions per lo proviment de materiaus, d’equipaments e dei mejans necessaris per sa mesa en plaça.
Aicí, l’acòrd es negociat entre doás institucions, que l’amainatjament de la plaça es un projècte public.
Ara, un arqueològ solet trabalha sus lo chantier per gaitar son avançada e gerir lo risque en cas de descubèrtas. Lei manifestants amassats dimars demandan la mesa en òbra de cavaments sistematics per una còla professionala.
La comuna clama que l’escalier doble èra dins lo projècte d’origina tre la fondacion de la catedrala, au sègle XI. En aqueu cas, a ja esperat un brave moment avant de veire lo jorn. Pòt ben nos laissar un pareu de mes per veire çò qu’es escondut dins lo sòu, despuei un temps plus lòng encara bensai.
La nòva es contada:
Es possible de leis ajudar en signant la peticion mesa en plaça per lei sindicats.
Arqueò d'Aquí 
Deishar un comentari