L’intrada de la Bauma de Cosquer es immergida per 37 m de fons, au pèd dei bauç dau Cap Morgiu, dins lo pargue nacionau dei Calancas. A 30 minutas en batèu dau centre de Marselha, es la soleta cavitat ornada au monde que son intrada es sota lo nivèu de la mar.
La bauma foguèt descubèrta en 1991 per Henri Cosquer, marin e escafandrier experimentat, que teniá un club de sota de Cassís. Es renomada per lo perfum d’aventura qu’envirouta sa descubèrta, per sa proximitat amb una granda vila e per sei representacions unicas de la fauna anciana en bòrd de Mediterranèa. Menaçada per la montada deis aigas, l’inventari e la fotografia en 3D de sei mendres detalhs es un enjòc scientific major.
A Marselha, l’emplaçament de la bauma e aqueu dau facsimile
Clic : crèdits e legenda
Sei pinturas foguèron datadas au carbòni 14. Se despartisson en un periòde gravetian, aiçà vèrs 27 000 AP, e un periòde epigravetian ò solutrean, aiçà vèrs 19 000 ans AP.
Foguèt frequentada pendent la darrièra glaciacion mentre que lo nivèu de la mar èra mai bas de 120 m e èra accessibla a pè sec, lo limit dau litorau estent 8 km mai luènh. Maugrat aquò, una part de son originalitat es liada a la preséncia rarissima de representacions de la fauna de mar : grands pingüins, buous marins (fòcas) e peis, au costats d’animaus mai comuns tau coma de chivaus, bisons, buous ancians, bisons, megaceròs, cèrvis e cèrvias, camoç, antilòps saiga, un boquetin e la tèsta d’un lion dei cavèrnas.
Amb 65 mans negativas sus sei parets, ò 69 segon lei còmptes, es tanben la segonda ò tresena plus dotada en Euròpa après Gargàs e benlèu avans El Castillo en Cantabria (Espanha). Fòrça an de dets incomplets que foguèron fachs en plegant lei dets.
Estampon d’una man negativa de la Bauma de Cosquer.
Musée d’Archéologie Nationale de Saint-Germain-en-Laye.
SiefkinDR, CC-by-sa.
Lei pinturas de mans e la fauna maritima son caracteristicas de la bauma. Clic : crèdits e legenda
Arqueò d'Aquí 